హైదరాబాద్‌లో వాన: చల్లబడిన వాతావరణం

హైదరాబాద్‌లోని పలు ప్రాంతాల్లో వాతావరణం ఒక్కసారిగా చల్లబడి తేలికపాటి నుండి మోస్తరు వర్షం కురిసింది. బంజారాహిల్స్, ఖైరతాబాద్, పంజగుట్ట, ఎల్‌బీనగర్, ఉప్పల్ తదితర ప్రాంతాల్లో కురిసిన చిరుజల్లులు, గత కొన్ని రోజులుగా ఎండ తీవ్రత, ఉక్కపోతతో సతమతమవుతున్న నగరవాసులకు ఎంతో ఉపశమనాన్ని ఇచ్చాయి. మరోవైపు నల్గొండ, వికారాబాద్, రంగారెడ్డి, సంగారెడ్డి, మహబూబ్‌నగర్ జిల్లాల్లో ఉరుములు, మెరుపులతో కూడిన భారీ వర్షాలు కురిసే అవకాశం ఉందని వాతావరణ శాఖ హెచ్చరించింది. వర్షం పడే సమయంలో ప్రజలు చెట్ల కింద ఆశ్రయం పొందవద్దని అధికారులు సూచించారు.